Synod Bookroom BOOK NEWS - February 2013

Staff Notation Hmahruai: A hnam ang pawha kan mamawh em em mahnia Staff Notation zirna lehkhabu, Mapuia Fanai buatsaihah hian Music Scale hrang hrang tarlan a ni a, Circle of fifths sawifiah a ni bawk. Key signature, Time signature, Note leh an hlut zawngte tarlan a nih bakah Keyboard leh Guitar-a  Staff notation tum dan tarlan a niin Staff Notation leh Tonic Solfa khaikhin a ni bawk.

A man Rs. 50/-

Hringnun II : I pawisa neih zat i chhiar dik thei a, i san zawng pawh i teh dik maithei. Mahse i mizia leh i nihna dik tak i inhria em? Nangmah i inhriata i inhmuh dik theihna tur chu he lehkhabuah hian funkhawm a ni e. Hringnun I buatsaihtu  Pu Vanneihtluanga bawk khan Hringnun II hi a rawn peih leh ta.

A man Rs. 100/-

Ringtu leh sum : “Bible-in sum chungchang min zirtir dan”, “Leiba sal atanga chhuahna kawng”, “Engvangin nge mite hi leiba khura an pil thin?” tih leh  “Tangka sum chungchanga hriat tur pawimawh” tih thupui pawimawh tak tak hmanga Timothy Sui Lian Mang, Burma ram hmun hrang hranga Misionary tir chhuaka Bible lehlin lama sulsutu pawimawh takin Bible-in sum chungchanga awmdan tur min zirtirna a puanchhuahna hi sum vanga buai thin ringtute tan lehkhabu ro tling a ni.

Aman Rs 30/-

Hla Kungpui pahnih Zasiama leh Sialkhawthanga :  Zofate hlachuam sak nin theih loh; “En ru Pathian Beramno sual phurtu”, “Leiah a lo piang Van Lalbera chu” leh “Thlarau Thinghlim Thuro Nunnem” bakah hla dang tha tak tak 7 phuahtu Zasiama chanchin leh “Dam chhungin i thawk thuai ang u” tih hla phuahtu Sialkhawthanga, Tlangnuam khua ve ve te chanchin leh an hla phuah dan ngaihnawm chu R.L. Thanmawia’n a buatsaih fel leh ta. He lehkhabu  hi hla te lo pianchhuah dan ngaihnawm ti mite tan inhnangfakna tham a ni e.

A man Rs.50/-

Zoram Khawthlir : K. Remruatfela, phaia lehkha zir, kum 22 mi lek chuan a thinlung zawng zawnga ram leh hnam a thatna tur  a suangtuah thin chu mitin chhiar theihin a rawn tlangzarh a. Zirlaite leh Politics lam ngaihventute tan thil chhinchhiah tlak tam tak, ideology thar min pe thei a awm.

A man Rs. 120/-

Mihrang leh Sahrang : He lehkhabu ziaktu Pu A. Thanglura hi Mizo zinga Minister hmasa ber leh LLB pass hmasa ber, tawng bungraw ngah tak a ni a. Chutiang miin mi leh sa chungchang duh tawka a sep rawtuina hi thu leh hla ngaina mi tan hrawkfah thama ngaihnawm a ni e.

A man Rs. 150/-

Indonesian Naupang thawnthu : Mut hmuna naupang thawnthu hrilh mek melh tur 15 zet lawrkhawm, an nun kaihruai tha thei ni bawk si, ngaihthlak nawn fo pawha ninawm lo tur chu Laltanpuia Chhangte chuan a rawn peih fel leh ta. Naupang thawnthu lawm rual neite tan a tangkai hle ang.

A man Rs. 50/-

Mizo tawng chhuina: Mizo hnam leh tawng humhalhna kawnga mi thawhhlawk, lehkhabu 11 lai ziak tawh C. Chhuanvawra chuan a lehkhabu chhuah tawh zinga hautak a tih ber, Mizo hnahthlak tawng hrang hrang a lakkhawmna chu a peih fel ta. Mizo tawng tobul leh Mizo tawng chungchanga hriat ngaite awlsam taka zawnchhuah theihna a ni e.

A man Rs. 150/-

Chantual Ennawm Bu 2-na : Lemchan tawi 10; Comedy 5 leh Tragedy 5 awmna lehkhabu chu Mizo Drama & Theatre kum 100 tlin lawmna pualin Dr. Laltluangliana Khiangte chuan a rawn tichhuak ve leh ta. Lemchan thawnthu lam tuipuite tan thu lawmawm a ni ngei ang.

A man Rs. 120/-